Við tæknisæðingu eru sáðfrumur, annað hvort frá maka eða gjafa, undirbúnar á rannsóknarstofu og síðan settar inn í legið í gegnum leghálsinn með þunnum og mjúkum plastlegg. Meðferðin er framkvæmd í tengslum við egglos, annað hvort í náttúrulegum tíðahring eða eftir væga örvun eggjastokkanna. Mikilvægt er að tímasetja meðferðina vel og fylgjast náið með egglosi til að hámarka líkur á þungun.

Tæknisæðing getur verið góður kostur fyrir einstaklinga eða pör sem eiga erfitt með samfarir og getur einnig hentað yngri pörum sem hafa ekki verið að reyna lengi að verða þunguð.

Fyrir samkynja pör og einhleypar konur er tæknisæðing með gjafasæði oft fyrsta meðferðarúrræði og árangur af slíkri meðferð er almennt góður.

Tæknisæðing hentar síður pörum sem hafa reynt að verða þunguð í langan tíma án árangurs. Við óútskýrða ófrjósemi er árangur oft betri með glasafrjóvgun (IVF) en tæknisæðingu og því getur verið ráðlegt að fara beint í slíka meðferð.